चाफळ, उमेश सुतार : खालची जाळगेवाडी, तालुका पाटण येथे बिबट्याने संपत सिताराम साळुंखे यांच्या शेडमध्ये बांधलेल्या वासरावर हल्ला करीत त्याला जागीच ठार केले, ही घटना मध्यरात्रीच्या सुमारास घडली. दहा दिवसांपूर्वी साळुंखे यांच्या कुत्र्याचा सुद्धा बिबट्याने फडशा पाडला होता. या प्रकारामुळे ग्रामस्थ भीतीच्या छायेखाली आहेत.
बिबट्या थेट लोकवस्तीत येऊन जनावरावर हल्ला करू लागला आहे. त्यामुळे शेतकऱ्यांना शिवारात फिरणे सुद्धा मुश्किल झाले आहे. खालची जागेवाडी येथील संपत साळुंखे यांनी घराला लागून असलेल्या शेडमध्ये गाईचे वासरू बांधले होते. नेहमीप्रमाणे रात्री त्यांचे कुटुंब झोपी गेल्यानंतर रात्री अडीचच्या सुमारास वासराचा ओरडण्याचा आवाज आल्याने साळुंखे शेडकडे गेले, यावेळी बिबट्याने वासराला जबड्यात पकडले होते. त्यांनी आरडाओरडा करताच बिबट्याने वासराला सोडून पळ काढला, मात्र वासरू जागीच ठार झाले होते.
